МУУГЗ, найруулагч Б.Баатарыг СҮҮЛЧИЙН ЗАМД нь үдлээ

2018-03-02 08:58

 БАЯРЦАГААНЫ БААТАР
/1959-2018/


         Монгол Улсын Урлагийн гавьяат зүтгэлтэн, найруулагч Баярцагааны Баатар 2018 оны 02 дугаар сарын 26-ны өдөр өвчний улмаас таалал төгсөж тайз, дэлгэцийн урлаг, уран бүтээлчид, түүний гэр бүл, төрөл төрөгсөдөд хүнд гарз тохиолоо.


        Баярцагааны Баатар нь 1959 онд Улаанбаатар хотод төрсөн. 1977-1979 онд Теле кино үйлдвэрт туслах найруулагчаар ажиллаж байгаад 1979 онд Украйн улсын Киев хотын И.К.Карпенко-Карыйн нэрэмжит Театр урлагийн дээд сургуульд элсэн суралцаж 1984 онд драмын найруулагч мэргэжлээр төгссөн. Б.Баатар 1985-1999 онд Монголын радиод найруулагч, уран сайхны удирдагч, Монгол телевизд программын зөвлөлийн даргаар ажиллаж байгаад 1999 оноос Улсын драмын эрдмийн театрт ерөнхий найруулагч, найруулагчаар ажиллаж байлаа.


        Б.Баатар нь театрын тайзнаа В.Ёжовын “Гургалдайн дуут шөнө”, Э.Оюуны “Гарваа”, Б.Дударевийн “Цэргүүд”, Ш.Гүрбазарын “Сэрүүн зүүд”, Б.Лхагвасүрэнгийн “Дутуу хээтэй тооно”, “Хүйтэн сэнтий”, “Атга нөж”, Д.Урианхайн “Хүн бүгд би”, “Харанхуйд харагдахгүй юу 2-1=0”, Д.Мэндсайханы “Ээжээ”, “Мануухай”, “Худалч эгч”, Ц.Хулангийн “Монгол ардын суут”, А.П.Чеховын “Цахлай”, В.Н.Гоголийн “Амьгүй албат”, М.Сервантесын “Кихот ноён”, Лев Толстойн “Адууны түүх” зэрэг үндэсний болон дэлхийн сонгодог бүтээлүүд, “Маш нууц”, “Бид ингэж ялав”, “Рин авгай ба аюул”, “Шөнийн сүүдэр” зэрэг 20 гаруй радио жүжиг, “Хүннү”, “Шагай” зэрэг теле жүжиг, “19”, “Тэнгэрийн андгай” зэрэг дэлгэцийн бүтээлүүд нь ард түмэн үзэгч олны мэлмийг баясгаж, сонорыг мялааж ирсэн авъяаслаг уран бүтээлч байсан юм.

 

           Тэрбээр тайз, дэлгэц, телевиз радиод бүтээсэн шилдэг бүтээлүүдээрээ олон улсын болон өөрийн оронд зохион байгуулагдсан фестиваль наадмуудад амжилттай оролцож 1989 онд “Сэрүүн зүүд” жүжгээр “Драмын шилдэг найруулагч”, 1992 онд “Шөнийн сүүдэр” жүжгээр Япон улсад зохион байгуулагдсан Радио жүжгийн наадамд “Шилдэг найруулагч”, 2014 онд “Би Эдит Пиаф байна” нэг хүний жүжгээр Коссова улсад зохион байгуулагдсан Моно жүжгийн фестивалиас “Гран при” шагнал, 2001 онд “А.П.Чехов XXI зуун” олон улсын наадмаас “Цахлай” жүжгээр “Шилдэг найруулагч”, 1996 онд “Хүннү” бүтээлээр “Гоо марал” шагнал, “Кихот ноён” жүжгээр БСШУЯ-ны “Мөнгөн мод” шагнал, “Гэгээн Муза” III, IV,X, XI наадмуудаас “Шилдэг найруулагч”-ийн шагналыг тус тус хүртсэн.

        Б.Баатарын Монголын соёл урлагийг хөгжүүлэхэд оруулсан хувь нэмэр, авъяас чадвар, хөдөлмөр зүтгэлийг төр засаг, олон нийтийн байгууллагуудаас өндрөөр үнэлж, Ардын хувьсгалын ойн медаль, Соёлын тэргүүний ажилтан цол тэмдэг, Хөдөлмөрийн хүндэт медаль, Э.Оюуны нэрэмжит шагнал, 2007 онд Монгол Улсын Урлагийн гавьяат зүтгэлтэн цолоор шагнасан билээ.

Монголын тайз, дэлгэцийн урлагт өөрийн амьдрал, хөдөлмөр зүтгэл, авьяас билгээ зориулан хоёргүй сэтгэлээр зүтгэж ард түмнийхээ хайр хүндэтгэлийг хүлээсэн дахин давтагдашгүй олон сайхан бүтээлүүдээрээ мөнхрөн үлдсэн таны гэгээн дүр төрх бид бүхний сэтгэл зүрхэнд дурсагдах болно.

 

Боловсрол, Соёл, Шинжлэх Ухаан, Спортын яам

Улсын драмын эрдмийн театрын хамт олон

 

 

 

 

 

 

 

 

Та алдаатай текст байвал идэвхжүүлээд Ctrl+Enter дарж илгээнэ үү.
Та мэдээ илгээх бол энд дарж илгээнэ үү.

Төстэй сэдэв

Сэтгэгдэл илгээх 2 Таны сэтгэгдэл бусдад нөлөөлөх хүчтэй
Сэтгэгдэлүүд
Нийт: (2)

Зочин /103.10.23.153/

2018-03-02 15:51

Бурханы оронд төрөөрэй ум ма ни бадми хум.

Хариулах 0 0
Зочин /202.9.43.30/

2018-03-02 09:12

Ene medrel selfi hiigeed baigaamuu yagaad baigaan

Хариулах 1 1
Зочин /49.0.218.4/

2018-03-02 14:07

Chi.harin.setgehui.muutai.l.bna.da.bichleg.hiij.bhad

Хариулах 0 0

 

АНХААРУУЛГА: Уншигчдын бичсэн сэтгэгдэлд ekhsurvalj.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 80127556 утсаар хүлээн авна.