Д.Сумъяабазар: ХЯТАДЫН хил рүү гарах НҮҮРС тээвэрлэгч автомашины тоо НЭМЭГДЛЭЭ

2018-04-17 15:38

 

    Уул уурхай, хүнд үйлдвэрийн яамнаас “Ил тод, хариуцлагатай уул уурхай” хэвлэлийн бага хурал зохион байгуулж, хурлын мэдээллийн эхэнд аж үйлдвэрийн салбарын нийт бүтээгдэхүүн үйлдвэрлэл 3.3 их наяд төгрөгт хүрч өмнөх оны мөн үеэс 584.3 тэрбум төгрөгөөр өссөн гэж мэдэгдлээ.

 

    Тодруулбал уул уурхай, олборлох аж үйлдвэрийн нийт үйлдвэрлэл эхний улиралд 2.4 их наяд төгрөгт хүрч өмнөх оны мөн үеэс 20.4, нүүрс олборлолт 784.4 тэрбум төгрөгт хүрч,  жилийн өмнөхөөс 214.1 тэрбум төгрөгөөр өссөн үзүүлэлттэй гарсан  байна. Мөн металлын хүдэр олборлолт 1.3 их наяд төгрөгт хүрсэн 2017 оноос 150.6 тэрбум төгрөгөөр тус тус өссөн нь голлон нөлөөлжээ.

 

    Аж үйлдвэрийн салбарын нийт бүтээгдэхүүн үйлдвэрлэлд Уул уурхай, олборлох салбар 72.2 хувийг эзэлж байгаа аж. Салбарын яам Баялгийн сангийн тухай хуулийг боловсруулан УИХ-д өргөн барихаар ажиллаж байгаагаа мэдээллийн үеэр мөн дуулгасан. 

 

    Энэ тухай Уул уурхай, хүнд үйлдвэрийн сайд Д.Сумъяабазар хэлэхдээ, “Сингапур, Казахстан, Норвеги зэрэг орнууд баялгийн сангаараа дамжуулан хуримтлал бий болгож, нийгмийн салбаруудаа хөгжүүлсэн байдаг. Казахстан  баялгийн хоёр сангаар дамжуулан хувьцааны арилжаа хийж байна. Баялгийн сантай улс орнууд хөгжиж буйг бид зүгээр хараад сууж боломгүй. Дэлхийн зах зээл дээрх эрдэс баялгийн үнийн өсөлт биднийг хүлээхгүй. Тиймээс  “Эрдэнэс Монгол” компани дээр түшиглэн баялгийн сан, үндэсний хуримтлалын санг бий болгохоор ажиллаж байна. Дээрх сангийн хуулиудыг УИХ-ын гишүүд болон Засгийн газрын түвшинд дэмжсэн. Эдийн засгийн эргэлтэд уул уурхайн салбарын бүтээгдэхүүнийг  оруулахын тулд  эхлээд дэд бүтцийн асуудлыг шийдэх хэрэгтэй” хэмээсэн.

 

    Уул уурхайн сайд Д.Сумъяабазар хэвлэлийн хурлын төгсгөлд сэтгүүлчдийн асуултад ийнхүү хариулав.

 

    —Ерөнхий сайдын БНХАУ –д хийсэн албан айлчлалаар уул уурхайн салбарт дорвитой шийдэл гарав уу. Петрочайна компанитай бүтээгдэхүүн хуваах гэрээний асуудлыг хөндсөн үү?

БНХАУ Монгол Улсыг бүх талаар нь дэмжиж ажиллана гэдгээ айлчлалын хүрээнд мэдэгдсэн.Айлчлалын үр дүн өчигдрөөс эхлэн гарч байна гэж хэлж болно. Гашуунсухайт боомтоос хятадын хил рүү гарах нүүрс тээвэрлэгч автомашины тоо нэмэгдлээ. Харин “Петро чайна” ХХК-тай 1993 онд байгуулсан газрын тосны бүтээгдэхүүн хуваах гэрээнд өөрчлөлт оруулах эсэх асуудлыг судлах ажлын хэсэг  байгуулагдаад ажиллаж байгаа.

 

    —“Эрдэнэс Тавантолгой” компанийн нүүрснээс 268 мянган тонн нүүрс дутсан гэх юм. Энэ үнэн үү. Юунаас бол нүүрс  дутах болсон бэ?

    Яагаад  нүүрс дутсан эсэхийг судлаад   мэдээлэл өгье. 268 мянган тонн нүүрс алга болсныг судлах ажлын хэсэг байгуулна.

 

    —Оюутолгойн  гэрээний асуудал нэлээн дэвэрч байна. Эхнээсээ төрийн томоохон алба хашиж байсан нөхдийг шалгаж байна. Рио Тинто группээс үүнтэй холбоотой мэдээлэл ирүүлсэн үү?

    Гэрээний асуудлыг хуулийн байгууллагууд  шийдвэрлэх байх. Ер нь бол Оюутолгойн гэрээ ямар нэг байдлаар гацахгүйгээр явах нь зүйтэй гэж бодож байна.  Рио Тинто группээс тайлбар, мэдээлэл ирүүлээгүй.

 

 

 

Та алдаатай текст байвал идэвхжүүлээд Ctrl+Enter дарж илгээнэ үү.
Та мэдээ илгээх бол энд дарж илгээнэ үү.

Төстэй сэдэв

Сэтгэгдэл илгээх 0 Таны сэтгэгдэл бусдад нөлөөлөх хүчтэй
Сэтгэгдэлүүд
Нийт: (0)

 

АНХААРУУЛГА: Уншигчдын бичсэн сэтгэгдэлд ekhsurvalj.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 77114907 утсаар хүлээн авна.